نصائح لكل سائح {إستعدادات وتجهيزات ونصائح لسفر سياحي ممتع }

يسعد مساكم في حلكم وترحالكم ..

$نصائح لكل سائح {إستعدادات وتجهيزات ونصائح لسفر سياحي ممتع } Images?q=tbn:ANd9GcSbgbaiHz8Q54TD5_Ucn0wJ395OzG2v_UAfgxSrIMkbf8PuDFQwHQ$

موضوعي واضح من عنوانه ..
وهو عباره عن مجموعه من النصائح
بنيتها على عدة تجارب مررت بها وشاهدتها بام عيني
حبيت اجمعها والخصها في هالموضوع بعد ماشفت الكثير والكثير من الاستفسارات
بخصوص كل مايتعلق بالسفر

؛؛

انا من عشاق السفر .. وبيني وبينكم ودي أهاجر مو بس أسافر .. خاصه عقب سالفه ال90 مليون
اعشق السفر مهما كانت الوجهه , واجد متعه كبيره فيه واحب الاستفادة من كل ثانيه من وقت رحلتي
ومن كل تفاصيل تمر علي ..
لابد من الاخطاء في اول سفرة لكن لو استمرت الاخطاء في كل رحلاتك بيكون وقتها
عندك خطب !
اما انك ماتتعلمين من اخطاءك واما ان مفهوم السفر عندك بدون ملامح
انا ضد السفر بدون ترتيب وبدون خطه واضحه والاهم يكون معاك صحبه
تشجع على سير خطه السفر في طريقها..
لابد من الإتفاق الكامل بينك وبين شريكك في السفر .. أو شركاءك في حال كنتي من هواه
السفرات الجماعيه أو كنتو عيله راهيه ..
أنا ضد السفر الجماعي تماماً ولاأجد فية متعه إطلاقاً ..
طبعاً أقصد بالجماعي لما يروح معك مجموعه كبيرة من اهلك او اهل زوجك ...
لأن السفر بالنسبه لي ورقه وقلم .. كل شي مبرمج ومرتب .. وجدول اليوم كله مرسوم
حتى لو قبل بليله .. لكن لما يكون معك مجموعه كبيره انسي الورقه والقلم واستبدليها بالبندول ..
ههههههههههههه بيصدع راسك من اختلاف الآراء والأوقات ..
عموماً ..
كل واحد ياخذ من الموضوع اللي يناسبه ..

{ التخطيط للسفر }

مثل ماقلت .. أول ركيزة لرحلة سفر ناجحه ( التخطيط المسبق + التنظيم ) ..
يعني في حال كانت الرحله دوليه .. لابد من التخطيط وعمل الحجوزات قبل الرحله بما لايقل عن 5
أشهر .. (ترى مو كثير أبداً ) بالعكس لو قبل بعد أفضل ..
والسبب أنك راح تحصلين على :

*خيارات سكن مناسب بسعر اقل ..
*اسعار تذاكر بسعر أقل ..
*وقت كافي للبحث وترتيب جداول الرحله ..

للاسف الشديد ان كثير من السياح تذهب رحلاتهم هباء , ومايمديهم يلحقون على كل معالم
المكان اللي راحوا له لأنه ماكان فية وقت كافي لهم للبحث ..
طبعاً لابد يكون فية اتفاق بينك وبين شريكك على الوجهه واللي بتحددها ميزانيتكم أولاً .
والهدف اللي ينشده كل فرد منكم في المكان المنشود ..
مثلاً .. فية اشخاص يحبون الطبيعه والهدوء .. وفية ناس يبون الصخب والسهرات .. وفية من يبي
المدن الحضاريه للتسوق .. آلخ ..
يعني حاولوا تدرسون خيارات كل شخص وتستقرون على مكان يجمع كل اللي يبون جميع الأطراف ..
وهالشي موب مستحيل إطلاقاً ..
لكن لو راح احد الأطراف لمكان مايرغب فيه ماراح تكمل متعه الرحله وفية بوز ماشي
وراك في كل مكان ..

بعد ماتستقرون على المكان والموعد .. تبدأ رحله البحث عن حجز الطيران .. ثم البحث
عن افضل المدن والفنادق .. وكل هالأشياء ممكن تسوونها وانتم في البيت .. من خلال النت ..
مع أن فية ناس كثير يفضلون الأستعانه بالمكاتب السياحيه .. لترتيب كل حجوزاتهم وسكنهم ..
أنا عني أستعين بهم بس للطيران .. أما الفنادق فأفضل البحث بنفسي من خلال المواقع
المتوفره وأشهرها بوكينق ..

؛؛

وحتى لو ماحجزتوا الفندق منه .. ممكن من خلاله تدخلون اسم الفندق اللي انحجز لكم
وتشوفون صورة واراء النزلاء اللي جربوة .. لأنها بتفيدكم جداً ..

وبعد تشوفون اشتراطات وقوانين الفندق .. اسفل الشاشه .. بالذات في الدول الأوربيه
موعد الدخول وأخر موعد لتسجيل الدخول ..
يعني فية فنادق لايمكن يسلمونك الغرفه قبل 2 الظهر مثلاُ .. وعندهم الساعه 7 أو 8 المساء
أخر موعد لتسجيل الدخول .. هالشي لازم تعرفونه عشان تحددون موعد رحلتكم ..
مثلاً لو الرحله مدتها 7 ساعات طيران ..
حلو تحجزونها الفجر .. بحيث يوصلون المدينه وتدخلون الفندق في وقت تسليم الغرفه ..
وماتضطرون تنتظرون وقت طويل + تستفيدون من اليوم كامل ومايروح عليكم ..
لأن مواعيدهم هناك مظبوطه مو زي العرب ..
قالوا 2 يعني 2 .. ماراح يعطونكم قبل .. وبعد في حال كان عندكم طفل ومحتاجين سرير اضافي
في الغرفه يكون موضح هالشي في صفحتهم في بوكينق ..
هل هم يوفرون اسرة ومهد اضافيه أو لا .. وهل هي مجانيه أو بمبلغ أضافي ..
وطبعاً كل الفنادق محتاجين تأكيد مع الحجز .. في حال احتجتوا سرير يجهزونه مسبقاً ..
مو تستنون لين تروحون وتفاجئونهم بطلبكم .. احسبو حساب كل شي قبل ..

{ اختيار شركات الطيران }

طبعاً فية منافسه قويه بين عدة شركات طيران على عروض السفر والرحلات في الصيف
وغالباً تبدأ هالعروض في شهر يناير أو فبراير من كل سنه ..
يعني قبل موسم السفر ب6 اشهر تقريباً .. ولاتكتفون بمكتب سياحي واحد
ممكن تمرون أكثر من مكتب وتشوفون أقل الأسعار .. واللي غالباً لو كان عندهم
عرض يشترطون شراء التذاكر في نفس اليوم ..
وهذي فرص .. وفي حال الإلغاء تدفعون غرامه 200 ريال عن كل تذكره ..
وحتى في حال تغيير الموعد بعد تدفعون غرامه ..
طبعاً من شركات الطيران المميزة والمشهود لها بالرقي والتميز
هي خطوط طيران (الإمارات + الإتحاد + القطريه )
ومن الأوربيه ( الفرنسيه +لوفتاهانزا )
لكم مطلق الحريه باختيار ماترغبون ومايناسبكم من الخطوط ..
مهما كانت وجهتكم ..

{ الفيزا }

بعد ماتتحدد وجهتكم .. واذا كانت تحتاج لفيزا ..
فبإمكانكم البدء بإجراآت الفيزا قبل الرحله بشهر ونصف أو شهرين ..
مع أنه شهرين كثير لكن اضمن .. لأن في ذروة الموسم تتأخر الإجراآت ..
بدال اسبوعين ممكن تتمدد لشهر أو أكثر ..
في حال كانت وجهتكم دول أوربا فأنصحكم بفيزة الشنقن ..
وهي تسمح لكم بالمرور بأكثر من دوله بنفس الوقت ..
وفي حال كان معاكم سيارة ممكن تتجولون بها بأكثر من دوله جاره ..
مثلا من النمسا تطلعون المانيا وفرنسا والعكس ..
المسافات جداً قريبه والتنقل بينهم أكثر من سلس ورائع ..
ولا أحد يوقفكم ولا حتى يسألكم عن شي ..
ماتحسون أنكم اجتزتوا الحدود أصلاً ..
من دول الشنقن :

فرنسا × ايطاليا × المانيا × اسبانيا × هولندا × السويد × الدنمارك × بلجيكيا × فنلندا× النمسا×اليونان

طبعاً تطلعون الفيزا من سفاره الدوله اللي بتجلسون فيها المده الأطول ..
ومن أهم متطلبات الفيزا وجود حجز طيران مؤكد + حجز فنادق مؤكد في نفس الدوله اللي رايحين تطلعون منها الفيزا .. طبعاً + المتطلبات الرسميه المعتاده ..
من صور شخصيه وكشف حساب بنكي
لرب الأسره وتعريف بالراتب باللغه الإنجليزيه والفيز القديمه ان وجدت ..
تكلفه الفيزا للشخص البالغ بدون أي رسوم 300 ريال ..
بس في حال معقب وغيرة راح يتدبل السعر ..

؛؛

{ تجهيزات السفر }

طبعاً يختلف التجهيز من عائله لأخرى ..
مثلاً لو اثنين عرسان رايحين شهر العسل تجهيزهم بيكون مختلف عن غيرهم
من عائله معاها أطفال كثير لعائله أقل .. وهكذا ..
انتم تحددون احتياجاتكم أكيد ..
لكن فية اساسيات ممكن تناسب الكل واحتياجات لاغنى عنها في السفر ..

في حال العروس مثلاً أكيد وغالباً مابتكون رحله تسوق ..
إلا ماندر .. يعني لازم تحسب حسابها يكون معاها أغلب احتياجاتها ..
طبعاً موب لازم تعبي الشنطه جزم اشكال وشنط وفساتين ومدري ايش ..
اهم شي تركز على احتياجاتها الخاصه والحميمه ..
شهر عسل ياماما ..
يعني قمصان النوم والحركات واحتياجات الجسم والنظافه وغيره ..
لبس الطلعات عادي اكيد بتكشخ مع زوجها بس يكون لبس مناسب للسفر
والأهم مريح عشان ماتتنكد ..
ولاتنسىن نقطه مهمه ان برا محد يشيل لك شنطك ..
يعني لو كثرتي العفش يابيجلس سبع البرمبه يجاملك
ويسحب في هالشنط في كل محطه وكل رحله
في حال غيرتو المدن ويتمصع ويجلس يذلك فيها دهر
ولا بتجلسين تسوين نفسك قرندايزر وتسحبين معاه وتخربين البرستيج ..
راعي هالنقطه انتي وغيرك ..
الشنط انتم مسؤولين عنها .. حتى بعض الفنادق ماعندهم خدمه شيل الشنط ..
لكن العائله احتياجاتهم غير ..
وخاصه اصحاب الأطفال ..( الله يعينهم )
لازم يكون معاهم عربه تنقلات خفيفه الوزن في حال وجود رضّع ..
غير توفير بعض الوجبات الخفيفه لهم من اللي يحبونها ومتعودين عليها
رغم اني ماافضل نقل اي اكل من البلدلأن كل شي متوفر بكل مكان , لكن بعض الأطفال
مو كل شي يعجبهم ويحبون اللي متعودين عليه ..
طبعاً الملابس وكأقتراح طبعاً وبما أن فية عضوة نزلت استفسار عن
الملابس اللي تحتاج :
اذا كانت المدة تقريباً 10 أيام ( مثلاً )
3 بنطلونات + بلايز أو قمصان + بالطو ..
طبعاً لاننسى البرد .. حتى بالصيف بعض الدول تكون الحراره فية أقل من 15
درجه .. وفية بالطوات خفيفه تنفع لأي طقس ومنها تكون ساتره
ولاننسى أن النقاب في بعض الدول مثل فرنسا مثلاً ممنوع
وقد يعرضك للغرامه ..
طبعاً الملابس الداخليه تكون بعدد الأيام لأنك ماراح تضمنين غساله ملابس على كيفك ..
+
حذا طبي مريح للسفر . وأنصحكم بهالماركه .. صحيح مو رخيصه بس
غير أنها مريحه جداً فهي لها فوائد علاجيه للظهر ..
ومحد جربها إلا وقطعها من المدح .. وهذا موقعهم ..

متوفره في اسواق الراياض ( حياة مول + بانوراما مول )
وأسعارها تبدأ من 900 ل1200

من أهم أحتياجات كل مسافر :

*مظلات بعدد أفراد الأسره .. فأغلب الدول الأوربيه والآسيويه ممطره على مدار العام ..
*شنطه صغيره فيها بعض الأدويه المهمه والإسعافات الأوليه ..
والأهم هو بخاخ المضاد للناموس .. خاصه أن بعض المدن
فيها ناموس كثير ويحرمكم من النوم ..
لأن بعض الفنادق مافيها مكيفات بحكم طبيعه الجو ..
وساعات يكون حر شوي وتضطرون تفتحون الشبابيك .. وقتها ابشرو بالهجوم الناموسي ...
وهذا النوع اللي استخدمه .. موش بطال .. وادور أفضل وأكثر فعاليه ..
متوفر بكل الصيدليات ..

(يمكن البعض مايشوف شنطه الادويه مهمه بس ترى الصيدليات مو بالسهوله تلقونها في بعض الدول
وبعضها يسكر بدري .. فعن الوهقه خلو معاكم إحتياط لأهم الإحتياجات الطبيه ...)

فيش دولي يناسب أغلب المقابس في اغلب الدول .. وهالنوع من الأفياش
مهّم جدا! توفره معاكم .. ومتوفّر في المحلات الكبيره مثل إكسترا وساكو ..
وسعره بحدود ال200 ريال إلى ال300 ..

شطّاف للوضوء (أعزكم الله ) .. فمن المعروف أن الفنادق في البلدان الأوربيه وبعض الآسيويه
لايوجد بها شطاف .. والحين الحمد لله صار متوفر ولو أنه يبهذل شوي بس أفضل من مفيش ..

ميزان الكتروني للشنط .. عاد هذا اهم شي هههههههههههه عن الصدمه في المطار
تعرفون لما تروحون تكونون بشنطه او 2 وهناك تفّرخ بقدرة قادر وتنشطر لمجموعه من الشنط
عاد هالميزان ممكن يعطيكم الوزن التقريبي للشنطه عشان تحسبون حسابكم ..
موجود في ساكو .. وسعرة في المتناول ..
ويختلف عن هاللي بالصورة بس مقارب له ..

شنط صغيرة للفلوس والأوراق المهمه .. واللي تخافون عليها ..
متوفره بأشكال وألوان عند بعض المحلات المتخصصه بتجهيزات السفر
هذي حقتي واللي ماأستغنى عنها .. ألبسها تحت البالطو
واحط فيها الفلوس والبطاقات وجوال احتياطي ..

{ اختيار الفندق }

للاسف أنه بعض الفنادق في بوكينق يحطون صور غير اللي تشوفونها بالواقع .. يعني تنصدمون
ساعات على الطبيعه من الفرق الشاسع بين الواقع وبين الموقع ..
لذلك الأفضل أنكم تاخذون من تجارب الغير واللي دايماً يصورون تقارير رحلاتهم في المنتديات
لأنهم بيروون انطباعهم عن الفندق وبيحطون صورة وبتكونون على بينه ..
غير ان ساعات ممكن يغريكم السعر ولما تروحون على الطبيعه تشوفون حتى الموقع
يخوف ولا بعيد جداً عن الأماكن السياحيه ..
والفنادق القريبه من المعالم بتكون غاليه جداً .. إلا في حال حجزتوا مبكر ..
ممكن تلقونها بسعر أقل .. بالإضافه إلى أن في كثير من الدول يكون فيه شقق مضمونه للعائلات
اسعارها اقل بكثير من الفنادق .. لكن مافيها طبعاً خدمه ولا تنظيف .. إلا في حالات نادره ..
وهي تنفع للعائلات الكبيرة ولهواه الطبخ والنفخ في السفر ..
اسألوا عنها بين خياراتكم ..

{ جدول الرحله }

الهدف من السفر للخارج يجب ان يشمل عدة نواحي متعه استرخاء تعلم تسوق ترفيه
هال5 اهداف لو حققتوها كلها برحل ه واحدة راح تكون رحلتكم ناجحه
طبعا انا اتكلم عن الرحلات السياحيه وليس العلاجيه او العلميه او رحلات رجال الاعمال
البعض ينظر للسفر انه فرصه تسوق فقط لاغير ومن اول يوم يوصل للمطار وهو متنقع في
الاسواق وحصيله الرحله مجموعه كبيره من الشنط الاضافيه +مبالغ كبيره جدا للشحن + ورطات كبيره في محطات القطار والنقل بسبب كثرة العفش
والمشكله غالبا مايكون متسوق لين قال امين للتجهيز للسفر

من اول العوامل المساعده على تنظيم يومكم في السفر هو تنظيم النوم وترتيبه حسب مواعيد
افتتاح وبدء مواعيد الاماكن السياحيه والمحلات في البلد المزار
( خلو النوم في ديرتكم لاحقين عليه مو تصحون 12 الظهر ولا 1 وتقولون ليه مايمدينا ؟ )
يعني لو مثلا رحلتكم لدول اوربيه
المحلات والاماكن السياحيه تبدأ من ساعات مبكرة من الصباح
تتراوح من 7الى 9 صباحا وتغلق في اغلب الدول الاوربيه فيما بين 7 و8 مساء
بحسبه بسيطه لو كانت رحلتكم تقريبا 10 ايام في اسواأ الاحوال
ومابديتو يومكم من الساعه 7 صباحا ماراح تلحقون على اغلب الاماكن المنشودة

يعني على بال ماتصحصحون وتلبسون وتتناقرون شوي لو كنتو من هواه المناقر
وتفطرون بتكونو دخلتوا على الساعه 9
وقتها يبدا الانطلاق لاتمام جدول زيارات اليوم لحد ماينتهي اليوم في ال9 مساءً
وتغلق كافه المحلات والانشطه السياحيه .. لأن كثير من المعالم والمزارات تحتاج لأكثر من 3
ساعات متواصله عشان تشوفونها كلها .. ومو معقول يقتصر اليوم كله على نشاط واحد فقط !
حرام يعني لو الرحله قصيرة بتنحسب عليكم سفرة وبس ..
لكن لو صحيتوا بدري ونظمتوا يومكم بامكانكم زياره معلمين + وجبتين طعام + راحه قصيرة + جوله تسوق ... < -- تقدرون والله
من أهم الأشياء اللي تسوونها أول ماتدخلون الفندق هو انكم تاخذون خريطه البلد وبروشورات
المعالم السياحيه من الرسبشن .. وتخلونهم يحددون لكم على الخريطه
اماكن المعالم واهم شوارع المدينه ومراكز التسوق وامكان محطات الباصات او المترو او القطارات
واهم المطاعم .. كل هذا راح يساعدكم كثير ويسهل عليكم المهمه ..
وترى عادي عندهم يخدمونكم فيها هذا من صميم شغلهم ..
الخريطه ذي راح ترافقكم في كل الرحله .. ولو تهتوا اي شخص ممكن يدلكم عادي الدنيا سهاله ..
راح تتفاجئون بكميه التعاون والبشاشه والوجيه السمحه اللي بتلقونها ..
(مسلمون بلا اسلام )

من ضمن التخطيط المسبق
يجب قبل زياره اي مدينه في العالم الاطلاع على عناصر مهمه فيها
منها :
الطقس

هذا موقع رائع يعلمكم عن حال الطقس في المدينه اللي تبون لمدة 7 أيام قادمه
ودقيق جداً

التوقيت

وهذا موقع من أفضل المواقع اللي جربتها اللي يساعدك على معرفه
التوقيت في كل دول العالم بمجرد الضغط على خريطه الدوله ..

العمله ومقدارها بعملتنا ..

وهنا هالموقع يساعدكم بهالتحويل

القوانين
قبل مزاراتها واماكنها السياحيه ..
لان الدول الغربيه تطبق القوانين على ارضها بصرامه شديد وماعندهم واسطات
ويابن العم وناخيك يابن اخي ومن طرف ابو محمد
هذي ياعيون امكم هنا في ديرتكم اللي قوانينها هشه لاتكاد تطبق الا لو اللي بيطبقها معصب ويبي يفش غله باحد

الالتزام بنظافه المكان اللي تمشون فية حتى لو كان شارع
لانه بغض النظر عن انها صفه ايحابيه تحدد الشخصيه اللي خلفها والبيئه اللي جاء منها
الا انها مطلب مهم ممكن يعرضكم للمساءله في بعض الدول الحضاريه ..
في الشوارع والاماكن السياحيه والمطاعم والفنادق كلها يجب ان تمرو فيها بدون ماتخلفون
وراكم اي دليل يدل على عروبتكم , واجمعو مخلفاتكم في اماكنها المخصصه..

في الكثير من المدن الغربيه لديهم قوانين هم حطوها والتزموا فيها بدون توجيه وتوعيه
مثلا استخدام السلالم الكهربائيه في الطلوع او النزول مايكون عشوائي
بل يلتزمون بالجانب الايمن من السلم في حال ان الشخص غير مستعجل وبيوقف حتى يصل
به السلم للاعلى ويتركون الجانب الايسر واللي يكفي لمرور شخص اخر
للي يكون مستعجل ويبي يختصر الوقت ويمشي على السلم ..
مثلا لو كنتو عائله اكثر من شخص لازم توقفون خلف بعض بخط مستقيم وماسكين الجانب الايمن سواء في النازل او الطالع
وهالشي مهم جدا لاتنسونه لانه يسبب لاستياء من اي شخص راح يطلع مستعجل
وانتم محتلين السلم كله

الالتزام بالدور في الطوابير من اهم السلوكيات الحضاريه اللي لازم تلتزمون بها في بلدانهم
لان الطابور شي مقدس جداً عندهم .. وراح تشوفون خط ملون على الأرض في المطارات
وأغلب مراكز التسوق الكبرى .. هالخط ماتتجاوزونه بأي حال حتى ينتهي اللي قبلكم
من الحساب .. لا وفي بعض الأماكن تنتظرون لحد مايكتبون في شاشه صغيرة تكون فوق الكاشير
نداء للزبون التالي .. واحيانا يكون مكتوب رقم الكاشير الفاضي عشان تروحون له ..
ناس ماشين بالنظام .. راح تستغربون وتندهشون من التزام الناس بالطوابير حتى لو طولها كيلو
محد يتذمر ولا يهاوش .. كلن مشغل نفسه بشي .. اللس يسمع شي واللي يقرا بكتاب
واللي ياكل ... عالم عجيب ..

{ تجنبوا البحلقه }

في اغلب الدول الغربيه الكل عايش حياته بحريه شديده .. محد عليه من أحد
طبعاً بما أننا شعب مافينا لقافه راح نستغرب من بعض المناظر ونضطر نتأمل لوهله
بس حاولو هالتأمل مايتحوله لحملقه وبحلقه .. لأن راح تجيكم ردة فعل لاترضيكم
هههههههههههههه ..
بالذات في الحدائق الهادئه وقطارات المترو في ساعات المساء .. راح تشوفون العجب ..
خلكم في حالكم ولاتطالعونهم ابداً .. وعلموا عيالكم مايطالعون بعد ..
راح تشوفون تقليعات غريبه وناس مهوله بعمرها باللبس والشعر وناس لابسه من غير هدوم
وناس بردانه ولاصقه في بعض .. هههههههههههه عادي عادي .. ولاكأنكم تشوفون ..
فهذا أكثر شي يستفزهم ..
لكن أهم شي تتجنبون الأماكن الخطرة ..
لاانصح بالخروج والسير في الشوارع بعد العاشرة مساءً خاصه ان في بعض المدن
عنصريه بغيضه تجاه الحجاب + ان البعض من السياح الخليجيين هداهم الله
يسيرون بكل اريحيه وهم مدججين بكل الاجهزة التقنيه والشنط والمحافظ المكدسه بكل مايملكون
وبذا يتركون انفسهم لقمه سلسه سائغه لضعاف النفوس
طبعاً تتراوح المخاطر الامنيه مابين متوسطه الا مرتفعه حسب المدينه وتكاد تنعدم في مدن كثيرة
يسودها النظام والالتزام بالقانون
لكن غالبا تكثر التحذيرات من قطارات الركاب والمترو في كثير من الدول الغربيه
بسبب الزحام وكثرة التوقف وتعدد الركاب واختلافهم في كل محطه توقف
مجرد احتياطات لكن صدقوني ومن تجربه مستوى الآمان مرتفع أكثر من كثير من الدول
العربيه .. اهم شي خليكم في السيف سايد وماعليكم ..

{ استخدام المترو }

المترو من اكثر الاشياء سهوله في الوصول بسرعه لكل مكان وفي اغلب الدول الأوربيه ..
نظامهم واحد تقريباً .. خطوط تعتمد على الألوان والحروف والترميز ..
خط اصفر وخط احمر وخط اخضر الخ ..
كل خط يوقف في عدة محطات موضحه كلها على خرايط المترو وعلى اللوحات الإرشاديه
داخل المحطات ...
طبعاً لازم يكون عندكم درايه كامله وين بتروحون وكيف نظامهم بالتيكتز ..
كل دوله ولها نظام خاص بها لكن مافية صعوبه اطلاقاً ..
لكن أهم شي تعرفون ان المترو سريع جداً ودقيق جداً ... بالثانيه المجدوله في ساعات
المحطه راح يوقف وفي نفس الثانيه راح يمشي ..
لذا لو كنتو جماعه لازم تركبون بسرعه لان الباب راح يتسكر ومالهم دخل بقى احد منكم او لا ..
لكن في نفس الوقت لما تركبون لازم تراعون انكم تمسكون جهه اليمين حتى ينزل
كل اللي يبون ينزلون للمحطه .. لأن لهم الأحقيه .. ثم تركبون بسرعه ..
لو معاكم اطفال لازم تفهمونهم انه لو لاسمح الله بقى منهم احد ماركب
فمو مشكله .. يلحقكم بالرحله اللي بعدها .. لايخاف ولا تخافون ..
بس طبعاً حاولو هالموقف مايحصل ..

{ في المطاعم }

النظام يسري حتى في المطاعم ... لما تدخلون المطعم لازم توقفون في المدخل لحد هم
مايدخلونكم .. وهالشي حتى هنا المفروض لكن ماشوف كثير يطبقونه ..
يعني كثير يدرعمون بكل فوضويه يدورون هم على طاوله .. وهالشي منافي لبروتوكولات المطاعم
لازم تنتظرين لحد مايمشي معاك الويتر وهو اللي يجلسك ويجيب لك المنيو
ولما تخلصين اختيار ماتنادونه .. طبعاً انا اتكلم عن اللي برا .. لأنه هنا للأسف
حتى عمال المطاعم قله اللي عندهم ذرابه ودرايه بشغلهم صح ..
هناك هو يكون عارف متى عطاك المنيو بيتركك دقيقتين تختارين وبيرجع لك ..
لأن فية مطاعم كثير يكون مجرد رفعك ليدك عشان تنادين الويتر قله تهذيب ..
بعيونك تطالعين وتنادينه بعيونك .. ( الأصول ) ..
طبعاً هناك أغلب المطاعم ماعندهم شي أسمه رسوم خدمه ..
لأنهم ينتظرون منك بخشيش ويعتبر شي اساسي عندهم .. فأحسبوا حساب هالشي
لازم تكون في جيوبكم خردة للبخشيش ..
ومن حقك لما تشوفين اي ملاحظه على الاكل تقولينها وبكل هدوء
واصلا اغلبهم يجلسون يطالعونك من بعيد لبعيد ويشوفون لما ماتمدين يدك على طبق معين
يجون يسألون ليه ماعجبك ؟ صارت معاي بلندن مرة .. ولما قلنا لهم ماعجبنا تخيلو وش سوو ؟
ماحسبوة بالفاتورة .. لأن العميل ورضاه عندهم رقم واحد ..
والضمير الحي ماله ديانه ولا هويه ..

{ نصائح متفرقه }

*فية محلات متخصصه بكل مايتعلق بالحجاب من حجابات وطواقي وبالطوات وبلايز طويله آالخ..
في الرياض .. في مجمع النمر التجاري تقاطع العليا العام مع موسى بن نصير ..
الدولا الثاني من بوابه نكست .. تلقون كذا محل عنده كل ماتبون ..
+ ممكن تلقون ملابس مناسبه للسفر في محلات الماركات الأخرى ..
على حسب وش تدورين ..

*الترتيب والتنظيم يجعل كل امورك سهله وممتعه .. حتى ترتيب الشنط والأغراض
في مكانها الصحيح يخليك تلقين كل شي بسهوله ..
مهم عندي تكون الشنطه مقسمه ومرتبه والأشياء الصغيرة
واللي ممكن تسبب فوضى احطها في شنط صغيرة داخل الشنطه عشان ماتضيع ..

* عند دايسوو علب صغيرة للكريمات والشامبو وغيرة من اغراض ضروريه
ممكن تعبينها فيه اسهل من العلب الكبيره ..

* ممنوع منعاً باتاً تشيلين معاك في الشنط اللي بالطياره اي سوائل او عطور او اي شي
يزيد سعته عن 100 مل .. راح يتصادر فوراً ..
+ اي شئ حاد حتى لو مقص اظافر .. وفي المطارات الأوربيه التفتيش صارم ..

* لما يطلبون منك فتح شنطه ولا خلع جاكيت لمجرد الشك لاتمانعين إطلاقاً ..
لأنك راح تتعرضين لعمليه تفتيش مهينه وتعطيل زايد
خليك عادي حتى لو فتشوا كل شنطك .. ساعديهم احسن

*اي شي تشترونه من البلدان الأوربيه تكونون دافعين زياده على سعره ضريبه
تقدرون تسترجعون هالمبالغ من المطار لكن بشرط انه
اي شي تشترونه تطلبون من المحل انه يعطيكم فاتورة تاكس فري
ويختمها ويوقعها وبدون هالفاتورة ماراح تسترجعون فلوسكم ..
ساعات لو كنتو صارفين ببذخ ممكن المبلغ اللي تسترجعونه بالآلاف ..
فلاتنسون هالنقطه لأنها حق من حقوقكم .. بس طبعاً لازم تحسبون حسابكم في العودة
انك تروحون بدري للمطار عشان طوابير التاكس طويله ساعات ..

*احسبو حساب الوزن الزايد .. معروف ان لكل راكب 30 كيلو مجاناً
وعلى عددكم .. واي كيلو اضافي راح تدفعون عليه مايقارب ال 70 ريال ..
اذا مو ناسيه ..

*خلو معاكم نوته صغيرة فيها اسماء المعالم والشوارع والمحلات اللي تبون
مع أن الجوالات والآباد يحلون هالشي بس سبحان الله زياده بالحرص
ممكن يطفون عليكم وتتوهقون ..

*قبل تطلعون من البلد اصرفو مبلغ بعمله البلد اللي بتروحون له
عالأقل 2000 ريال .. وخلوها للطوارئ .. طبعاً هناك ابد
ماراح تتعطلون نقاط الصرف الآليه في كل مكان ..

* لو معاك اطفال لازم تكلمينهم وتوعينهم انه في حال ضاع احد منهم ولا شي
كيف يتصرفون ..
ولازم لازم تحطين مع كل واحد منهم ( كرت الفندق اللي ساكنين فيه + مبلغ صغير ) للضرورة
لو ضاع ممكن يركب تاكسي ويرجعه الفندق ..
ويفترض يكون مع كل واحد جوال وشريحه اتصال تابعه للبلد اللي رايحين له

* طبعاً جوالتاكم السعوديه لازم تتقفل هناك وإلا راح تدفعون الوف مؤلفه
لين رجعتو .. افضل حل واوفر حل شريحه اتصال مسبق الدفع بسعر جداً معقول
وتكفيكم , ولو ماكفت يمديكم تشحنونها ..

* إذا كانت رحلتكم أوربيه أنصحكم وبعنف بإستئجار سياره والتجول
في الريف والمدن الصغيره .. لاتخافون والله الموضوع فية متعه لاتوصف ..
وأهم شي بالموضوع يكون معاكم القارمن .. سواء اشتريتوة من هنا
أو طلبتوة مع السياره .. عموماً أسعاره هنا تبدأ من 900 ريال ..

وممكن تخزنون فية احداثيات أي مكان تبون وكل ماعليكم أنكم بس تتبعونه ..

* لاتنسون أنكم رايحين للمتعه والترويح عن النفس .. خلو النكد والتنغيص
لين رجعتوا .. لاحقين عليه مهوب مخلص ..
استمتعوا بكل لحظه وبكل مكان وبكل شي تشوفونه ..
اكتشفوا عوالم جديدة وحضارات جديدة واطعمه جديده ..
لاتحرمون نفسكم من شئ طالما مايخالف الدين ..

* قبل تشترون اي اكل او آيس كريم أو حلويات أسالوا البائع لايكون فيها
مشتقات الخنزير أو داخل فيها الخمور ..
عادي يعلمونكم ترا ..

* بما أن الوقت اللي بتقضونه برا السكن طويل فطبيعي يكون معاكم شنطه
فيها كل الضروريات اللي ممكن تحتاجونها :
مناديل رطبه للتعقيم {أفضل ديتول }
المظلات , الخرايط , كتيّب المعلومات للرحله , محفظه صغيرة فيها
لصقات جروح ومسحات طبيه وبندول للطوارئ ..
وإذا معك أطفال كم نوع سناك على عصير وماء ..
الشنطه لازم تكون خفيفه ومن نوعيه جيده تتحمل ,
تلقونها عند أغلب المحلات الرياضيه المعروفه
nike . اديداس . كات (في القرعاوي )
وفيه محل حلو اسمه بوديوم في شارع العروبه
عندك شوزات مشي روعه وشنط وكل مستلزمات الرحلات والمشي ..

* شي ثاني مهم نسيت أذكرة وذكرته أرتوسه وهو مكواه الملابس ..
بالفعل مهمه جداً .. فية نوعيات مخصص للسفر منها بالبخار ومنها عادي

موجود لها شبيه عند ساكو .. ويمكن بعد تلقون نفس الشكل ..

؛؛؛

[size=21]وآخيراً .. وليس آخراً .. )
السائح سفير لبلده قبل مايمثل نفسه ..
ياليت نترك عنا نثر السلبيات في كل مكان نروح له .. ويكفي النظرة
الدونيه الإشمئزازيه الإستقعاديه اللي يطالعونا فيها الغرب ..
بسبب فئات سلبيه سلبت كرامه وطن ومواطنين
بتصرفاتهم الرجعيه ..
للأسف ويمكن هالشي شافوة كل اللي راحو برا ..
أن الغربيين يتحلون بخلق الإسلام أكثر من المسلمين ..
واللي راحو ورجعو أغلبهم جتهم صدمه حضاريه من اللي شافوة برا ..

لكن وش نقول ..؟
لقد أسمعت لو ناديت حيا ..
عالأقل ألتزمو بقوانين البلد اللي انتو فيه ..
وحاولو تغضون الطرف عن عاداتهم وتقاليدهم
لأنه في بلدهم يتمتعون بكامل الحريه اللي كفلها دستورهم ..
فمو انت اللي رايح اسبوع وتبي تصلح حالهم ..
هناك فرق بين الرحلات الدعويه واللي يقودها دعاه فاهمين وش يسوون
وبين الرحلات السياحيه واللي يقودها واحد راح يتمشى ويوسع صدره ..
يعني لايجي احد يهايط ويوزع كتب دينيه ولا يجلس ينصح وهو تلقينه
من طب الديرة ماصلى صلاة بوقتها !!
خل نكون واقعيين ونترك الدعوة لأهلها ..
لأن ساعات ممكن هالشي يسبب بتوقيفك ..
لكل مقام مقال ..
وبعد ..

يمكن أرجع أضيف شي لو تذكرت
لأن الموضوع طويل وجوانبه متعددة بصراحه
ويمكن اغفلت بعض التفاصيل المهمه ..
ويمكن كثير منكم عارفين كل التفاصيل اللي كتبت وأكثر
لكن متأكده أن فية مجموعه مايعرفونها ..
وحتى لو يستفيد من موضوعي شخص واحد مو مشكله
بيطرح ربي فية البركه ..

اجازة سعيدة للجميع..

[/size]


	توقيع \|\| ~ بلروزة

تسلم ايدك


	توقيع \|\| ~ E h s a s

وايدك

يسلموووووووووو ع المرور

مودتي


	توقيع \|\| ~ بلروزة