صبحكم / مسآكم الله بالخير جميعآ ..

هذا الله يسلمكم شرح طلب مني وما بغيت ارد اللي سآئلني فـ قلت أخليه موضوع هنا عشان الكل يستفيد منه..

طبعا الكل يعرف البرنامج المجنون الـ KMPlayer بس كثير ما يعرفون الخصائص القوية اللي فيه واللي تغنيك عن برامج كثير..

برنامج الـ KMPlayer فيه خصائص قص الفيديو وقص واستخراج الصوت والصورة من
المقاطع .. بس المشكلة ان بعض الاصدرات ما تعطيك هالخصائص بطريقة مباشرة
يعني لما تحمل البرنامج يمكن ما تلقى خيارات قص الفديو والصوت واستخراج
الصور مباشرة ويبغالك كم حركة تسويها عشان تطلع لك الخيارات كلها ..

أول شي عشان فيه إختلافات صغيرونه بإصدارات البرنامج راح اشرح على آخر
نسخة واللي يبغى يشوف نفس الشرح وما يختلف عليه شي يحمل النسخه الأخيرة
وان شاء الله الكل يستفيد..

حمل النسخة النهائية من هـــنـــآ

بس فيه حركة مفيدة ودي اقولها قبل نبدا وهي, اول ما نحمل البرنامج ونشغل
السيت اب .. احسن اننا تختار Full Install .. زي الصورة هذي:



بعدين نكمل السيت اب للنهاية عادي لحد ما يشتغل البرنامج وتطلع الواجهه حقت البرنامج.

اوكي نبدا وخلونا حلوين وتحملوا لاني بقرقر لين ما يبقى بدميجتي شي ما قلته


أول شي عشان نلقى الخيارات المتقدمة ومنها خيارات القص والإستخراج يبغى
لنا كم خطوة والصورة هذي توضح كل شي: ( بس نضغط رايت كلك بوسط الواجهة حقت
البرنامج ونختار نفس اللي بالصورة):



بعد ما نطبق اللي بالصورة ونضغط رايت كلك مرة ثانية على واجهة البرنامج بنحصل القائمة تغيرت وصارت كذا:



اوكي الحين خلاص صارت الخيارات المتقدمة موجود علطول عندنا بالبرنامج ونقدر نستخدمها.

هنا نحصل خيارات القص والإستخراج (Capture) :



الشرح حسب الارقام اللي بالصورة :

1- هذا لقص واستخراج الصوت.. حتى لو الملف اللي فاتحينه فديو نقدر نقص بس
الصوت منه. ولحد يقولي وشلون اقص الفديو من مقطع الصوت عشان ما اجلده
2- هذا لقص الفديو من ملفات الفديو < قل قسم
3- هذا لأخذ صورة من المقطع الحالي بالحجم الاصلي للفديو يعني لو انت مكبر
شاشة العرض وحطيت هالخيار بتنحفظ الصورة اصغر وبحجمها الاصلي.
4- هذا لأخذ صورة من المقطع الحالي بالحجم اللي انت تشوفه الحين.. يعني لو
انت مكبر الشاشة وحطيت هالخيارت بتنحفظ الصورة بالحجم اللي انت حاطه لما
اخترت هالخيار.
5- واخيرا هذا لأخذ صور ورى بعض يعني صور على شكل سيريز.. يعني مثلا أحدد
عدد الصور اللي ابيها بالثانية وعدد الصور اللي نبي نطلعها بعدين يسردها
لك.. وراح نشوف كيف بعد شوي.

اوكي الحين نمسك الخيارات اللي فوق وحده وحده .. > كني تعبت وحنا ما انتصفنا

اوبشن 1: استخراج الصوت:



1- هنا نختار مكان الصوت اللي نبي نقصه. وعند كلمه ِِِAudio encoder 1 و
Audio encoder 2 نقدر نختار صيغة الصوت اللي نبي واذا صرت ما تفهم
بهالامور خله وما جاك علي
2- هنا نضغط عليه عشان يبدأ يقص الصوت من اللحظة اللي نضغط فيها هالخيار. طبعا انت تسوي كذا والصوت او الفديو شغال.

اوبشن 2: قص الفديو:



1- مثل اللي قبله هنا نختار مكان حفظ الملف.
2- صيغة الفديو اللي بيطلع لنا بعد القص.
3 و 4 - هذي خيارات متقدمه للي يبي يغير صيغة الصوت المدموجه مع ملف
الفديو او مثلا يقص الفديو بدون صوت .. ( اللي يبي يقص الفديو بدون صوت
يختار Disable اللي عند رقم 4 )
5- هنا يبدا القص من اللحظة اللي نضغط فيها على هالزر.

اوبشن 3 و 4 : لأخذ صورة من المقطع الحالي بالحجم الاصلي والحجم الحالي:
هذي ما يبيلها شرح أول ما تضغط على هالخيار بيطلع لك مربع حفظ الصورة
علطول (الصورة اللي بتنحفظ هي الصورة اللي كنت تشوفها وقت ما ضغطت على احد
هالخيارين).

اوبشن 5 : صور على شكل سيريز



1- مكان حفظ الصور.
2- صيغ الصور اللي نبيها.
3- هذا الخيار اللي يسلمكم اذا بغيت تحفظ الصورة مع الترجمة اذا كنت حاط
ترجمة او مع رسايل البرنامج اللي تطلع لما تضغط بعض الخيارات وانت تناظر
الفديو.
4- هنا السنع كله :
في Number to extract :
نحدد Continuously اذا بغينا يدوس ويسرد لنا الصور بدون ما يوقف عن عدد
معين الا لما حنا نوقفه. او نحدد Numbers اذا بغينا نحدد عدد معين من
الصور نبيه. ونحدد Seconds اذا بغينا عدد الثواني اللي خلالها يسرد لنا
الصور.

وفي Frame to extract:
نختار Every Frame اذا بغينا كل فريم يطلع لنا صورة منه .. (والفريم هو
صورة كل حركة تتغير بالفديو واللي مجموعها يمثلنا الفديو كامل) يعتبر
صغيييير مرة تقريبا اجزاء من الثانية.. وبإختصار وبدون فلسفه لما نختار
هالخيار كل حركة تتغير يسجلها ويطلعها على شكل صورة.. < طيب لا تدف
نختار Every # Frame او Every # ms إذا بغينا نحدد عدد الصور بالفريم الواحد أو عدد الصور بالملي ثانية < صح كذا ؟ بالملي سكند مدري وشي عاد بالعربي
نختار In 1 sec... أو In 1 min إذا بغينا نحدد عدد الفريمات بالثانية او الدقيقة الوحده ,
<< يآ رب فهمتوا.. حتى انا احس انلحس مخي

6- هنا اذا خلصنا من الحوسه اللي فوق نقوله دووووس ويبدا يسرد الصور على حسب الخيارات اللي حطيناها ..
هذي الخاصية ترى مهيب شينه للي يحبون يسوون صور gif المتحركة حسب الرغبة .. مع ان فيه برامج اقوى بهالسوالف.

عالعموم هالمميزات هذي جزء وموب كل شي بهالبرنامج... بس بأمانة برنامج
بلاير مهوب شي بسيط انه يحتوي كل هالمميزات.. وهذا ان دل على شي ، دل على
جبروت هذا البرنامج < برآ

وإن شاء الله الايام الجاية انزل مواضيع زيادة عن مميزات هالبرنامج.. < لا تحرص

بكذا خلصت هذرتي اللي ما بغت تقضى..واتمنى اني قدمت شي الكل استفاد منه..