قبل المغربية مع خالة خيرية تزهم وتنادي إنتي فين يابدرية

بدرية في السطوح مع علوية يفرشو الطراريح ويخشخشوا الناموسية

يالله يابنت إنتي وهيا بسرعة شوية حاضر يا أمي دقايق ونخلص من القضية

يا واد يا أسعد فين أخوانك البقية في الزقاق بيلعبوا عسكر وحرامية




أزهم عليهم يطلعو لا تجيهم الجنية صلي عالنبي ياأمي دي ساعة مغربية

صدقة يا عباااااااااس أطلعو بلا أزية طيب طالعين خلاص مع ستي مهدية

مهدية لخيرية أولادك هدول فرفوشية زفوني في الدرج يقولولي ياستنا ياعسلية

عباس مجروح في رجلو بقزازة مرمية وصدقة ببجامة مقلمة وصخة زيالميكانيكية

خيرية .. إيش هادا حسبي الله عليكم شقاوية مهدية ...لا تضربيهم عشاني وإنتي رضية




حاضر ياأمي عشانك بس المرة دية يالله قدامي إنت وهو أتروشوا من الحنفية

وإنتي يا أمي أجلسي جمب المصلية عشان إذا أدن تصلي المغربية

وإنتو يابنات يالله تعالو نسوي المقلية ونزبط زلطة الحومر والفلفلية

بعد المغربية ، ياولد ياساتر طريق ياخيرية أتفضل يبو اسعد مافي غير عمتك مهدية

كيفك ياعمة نورتي البيت ياعودة وعنبرية تعيش ياجوز بنتي كلك ذوق ومفهومية

هيا سموا بالرحمن ونقنقو من المقلية ونونو نونو لقمة هنية تكفي مية




أسعد يوشوش أبوه يبغى هدية ماشاء الله نجح وأتخرج من الثانوية

أبشر ياولدي بس تجي فلوس الإكرامية ولايهمك يبويا مافي مشكلة حصبر شوية

ياواد عباس إيشبها كدا رجلك ملوية دخلت فيها قزازة يبويا من العصرية

تاني مرة فتح عينك لا أخرملك هيه ولا اشوفكم تلعبو حفايا ترى تاكلكم التكرونية

بدرية .. يبويا فين حتودينا هادي الصيفية والله يابنتي كالعادة الطايف حي البخارية

الله يسعدك يبويا نبغى أبها البهية يابنتي أبها بعيدة مرررررة وسفرية




خلاص اللي تشوفو يا أغلى أب في الدنيا ديه بنت ياعلوية ناوليني الكمر حقي والسديرية

أنا خارج دحين ياخيرية رايح الشامية أودي صك الوقف حق بيت السليمانية

خلي الأولاد يسبقوني للحرم تحت المكبرية عشان نصلي العشا ونكسب الفرض سوية

بعد العشا وفي السطوح عند المشربية خيرية تفت العيش في الحليب وبدرية مسلقحة متحنية

هاتي ياعلوية الجبنة البلدي والحلاوة الطحينية وكمان كم بيضة نسوي شكشوكة في الصينية

لمة حلوة وظريفة وعيلة عفوية أتعشو وعليهم بالخير يدوروا عالناموسية




عشان يصحو بدري مع أدان الفجرية لاسهر لاكسل يومهم كله نشاط وحيوية

فينك يا ايام زمان تشوفي حالنا والفوضجية مانعرف راصنا من رجلنا وحياتنا سارت ملوخية





ينااااااااسو على اهل الحجاااازي كلامهم يدنن اكتر شي


اتمنى تعجبكم

يناااشو عليهم

بجد حياتهم بسيطه وتدنن

تسلم ادينك يا ئمره

يا عيني عليكي فوووفوووو
الله يسعدك في كل اوقاتك
عجبتني مررررررررررررره
تعجبني الاشعار الحجازيه زي كدا
و حقت بيت جدي

اهلين مش مش

انتي الي ينااسو عليكي

نورتي يا البي ما ننحرمش طلتك ^^

اهلا اهلا علوووش

ويسعدك يااارب


نورت وشرفت التوووبيك

اكيد ينااسو عليهم احم احم

ربي ما يحرمنى طلتك الحلوووه ^^